سنة بتفوت ورا سنة
وأنا لسة مش عارف
بأقول يمكن السنة دى أعرف
تمر السنة وتيجى اللى بعدها
ولسة برضه مش عارف
أجهر بعقيدتى لكل اللى أقابله اللى مهما يدعي إنه بيحترم عقائد الناس
أول ما يسمع يتهمنى بالتخلف والرجعية ؟!!!
ولا أسكت وأهادن الناس عشان أريح دماغى وأكون محبوب ؟!!!
أكمل دراسة الهندسة
اللى بأحب أدرسها بس مابحبش أشتغلها ؟!!!
ولا أدرس العلم الشرعى بجد وأشتغل فى الدعوة ؟!!!
ولا أفضل فى بلدى بأجري الضعيف اللى يدوب معيشنى ؟!!!
ولا أسافر برة عشان أكون نفسى ؟!!!
أرتبط دلوقتى وأحب وأتجوز ومع الجواز حيجى الرزق ؟!!!
ولا أستعد وأكون نفسى مما جميعه وبعدين أتجوز ؟!!!
أشتغل فى الحكومة بكرامتى وأجر ضعيف ؟!!!
ولا أتمرمط فى القطاع الخاص وأنسى كرامتى ؟!!!
أحلق دماغى زيرو زى ما بأحب ؟!!!
ولا أسيب شعرى اللى بيسقط عشان شكلى بالزيرو مش عاجب حد ؟!!!
مش عارف
ومش عارف لحد إمتى حأبقى مش عارف !!!
كل اللى أعرفه
إنى نفسى أخدم ديني وبلدى
وأرد معروف أهلي
وأعمل نفسى إنسان صالح يترحم عليه الناس عند موته
بس إزاى أعمل كدة ؟!!!
لسة مش عارف
