الزواج

ياااااااااااااه

خلاص باقي إسبوع وأتم السنة زواج

مش عارف أقيم التجربة قوي 

بس إحساسي دايما 

إنه باكدج كدة على بعضه

لو انت بتحب اللمة والعيلة 

والدفء الأسري 

وكل المعاني الجميلة دي

ح تبقى مبسوط بالزواج

وده برضه يعتمد على طبيعة زوجتك وأهلها 

أما بقى لو زي حالاتي بترتاح وانت لوحدك

برضه ح يعتمد على طبيعة زوجتك :)

الحمد لله كما ينبغي لجلال وجهه وعظيم سلطانه

عمري ما كنت متخيل إني ح أبقى مرتاح ومبسوط كدة

خاصة مع إنسانة هي معترفة إننا مختلفين جداً 

مختلفين في طباعنا شوية 

مختلفين في هوايتنا 

لأن هوايتها الوحيدة هي النوووووم :)

بس مرتاااااح جداااا معاها

حبي ليها هو الحب الهادي ده 

اللي بيتشعوط مع أول سنة غيرة مني أو منها 

شعوطة لذيذة :)

بس طبعا مفيش حاجة اسمها تتجوز وتبقى حر كدة طليق

الجواز مليان قيود

وبأتخيل لما ربنا يمن علينا بأطفال 

أنا احتمال أهرب :))

الزواج سكن 

مع الإنسان الصح

وأظن رغم دماغها الناشفة دي 

إن ربنا كرمني ورضاني أخر رضا 

الحمد لله :)

سبيني أكتئب :)

على فكرة أنا متغاظ منك

من يوم ما خطبتك مش عارف اكتئب

وتقوليلي انسى تكتئب وأنا معاك

يا ستي أنا بأحب أكتئب

وبأحس براحة لما أقضيلي إسبوع كدة ماكلمش حد ولا حد يكلمني

يقوم تقولي ولا يوم واحد يعدي وانت مكتئب

وترجعي تقوليلي الكلمة اللى بأكرهها وانتي عارفة إني بأكرهها

" سيبك من العبط اللي في دماغك ده "

مش عارف ليه لما بتقوليلي الجملة دي  بخلاف أي حد

بتمسكني كريزة ضحك

وعارف مفروض ماقولش كدة ليكي عشان ح تمسكيها ليا J

بس ماشي مش مهم

المهم لو سمحتى سبيني اكتئب :)

وجدتها الحمد لله :)

من رحم المعاناة تولد الموهبة 

ويولد الإبداع 

وتأتي الحاجة للكتابة والكلام

ولولا القبيح ما علمنا قدر الجميل

ولولا اليأس ما عرفنا الأمل 

توقفت منذ فترة عن الكتابة هنا 

في ركني 

في بيتي 

في المكان الذي أجد فيه نفسي 

وكنت قد وصلت إلى حالة لا يعلم بها إلا الله 

من ضيق وكمد وعزوف عن الحياة 

وصرت إلى كائن لا أعرفه!!

حتى حدث ما لم يكن في الحسبان 

قابلتها 

وجدتها :)

وإن كنت دقيقاً 

وجد بعضنا بعضا :)

وقد ظننت أني بوقوعي في الحب 

قد أصل إلى درجة الإبداع 

ولم أعلم أن الحب يلهي 

وما دمت وجدت راحتي وودعت اليأس 

وولد الأمل من رحم المعاناة 

شل ذلك الأمل تفكيري 

فلا أقوم ولا أرقد إلا تفكيري في أم عبد الله :)

كنت أظن أنها ستكون كاتبة أو مبدعة أو متشربة لفنون الأدب 

وظننت أن الحب اختيار!!

ولكنك تصل إلى حد لا يشكل عندك فارق أن تفهم كلمة من كلماتك !!

ولكنك تعلم أنها هي من تبحث عنها 

نعم نتشاجر كل يوم 

على تفاهات لم أكن أظن أن أتشاجر عليها

وتتحملني بكل تفاهاتي 

امرأة مسلمة تعرف حق الله في زوجها

وتعلم طبيعة مهمتها في بيتها 

ولمن يسأل 

نعم فقدت حريتي قبل أن أتزوج :)

وما كنت أظن أن أسمح لإحداهن بفعل ذلك

ولكن 

صدق أو لا تصدق 

فقدتها مختاراً :)

وأحببت أن أشارككم الأفراح كما شاركتكم أتراحي من قبل 

فأنتم أحب الناس إلي 

وأنتم أيضاً تحملتم تفاهاتي 

فلتدعوا الله لي 

وأن أعود إلى هنا 

لأسقى البيت الخرب والورود الميتة بماء الحب :)

اختيار أم إجبار

أستحلفك بالله 

أستحلفك بكل ما يجوز أن يحلف المرء به 

أن تخبريني 

هل يختار المرء الحب إختياراً ؟ 

أم يٌجبر عليه إجباراً ؟!!

هل اختارك ثم أحبك ؟

أم أحبك ثم اختارك ؟!!

وكيف أحبك أولاً 

وقد حاصروني بحرمة كل شئ 

وحرمة كل إتصال

فانقطعت كل السبل لحبك 

وكيف أختارك 

وقد حاصروني بمظاهر خادعة 

لا ينفك أن تجلس معها جلسة 

لتعلم أن العقل خاوي إلا من بعض المسلسلات التركية والأفلام الهندية 

لا أريد أن أطرق كل باب لألقاك 

فأنا غير مقتنع بثقافة " التدوير " بكل معانيه 

ولا أريد علاقة محرمة 

أشعر فيها أني أسرق 

وبهذا نصل يا حبة القلب 

إلى نتيجة حتمية 

لا أرتضيها أنا ولا انتى 

لا يمكن أن ألقاك في وقت قريب 

الخطاب الأول

من محمد بن سلامة – رجل في غمار الناس - إلى أم عبد الله – أجمل نساء الكون في عيني -

السلام عليكم ورحمة الله

أما بعد ،،،،

فإني أحمد الله إليكي؛ فمنذ أن أراد الله قدراً أن ألقاك لم أعرف إلا الخير .

وتبدل حالي من اليأس والحزن إلي الأمل وعظيم السرور ، وآمل من الله أن تكونى على ما أنا عليه من السعادة .

فها أنا ذا أحقق حلم من أحلامي أن أبعث إليكي بكلمات تصف ما بداخلي ، لكني أراها الأن مهلهلة لا أجمع فيها أطراف الحديث فقد سلب إعجابي بك كل المرادفات، وأصبحت كلمات الجمال والمدح لا ترقى لجمالك ومدحك .

لم أكن أتخيل أبداًَ أن تبدأ حكايتي هكذا ، ولكن من منّا يختار لنفسه ؟! ، فمتى عرفتك شعرت أنني وجدت نصفي الغائب وحياتي القادمة .

وأنا يا رفيقة الدرب إنسان جلف لا أجيد التعامل مع النساء ، فتارة أخجل وتارة أعنّف وتارة أرق وأُشعر !! فلا أستقيم على حال. فيا عناء من اختارت الإقتران بي !!

سامحيني إن قسوت .. سامحيني إن نسيت .. سامحيني إن غفلت .. سامحيني إذا أصابتي الغيرة .. وغيرتي يا حبيبة نار تلظى !!

وليكن سبيل مغفرتك أني أسعى لحبك سعياً وهرولة ، وأريد من سعادتك ما أريده لنفسي ، بل هي نفس واحدة إما أن تشقى أو تسعد.

ولتعلمي أني يمكن أن أكون كل شئ إلا كاذباً .. إلا خائناً .. إلا غادراً .. إلا متعمداً جرحك أو إيذائك .

ويا ليتنا نحيا جميعاً وليتنا... نصير إذا متنا ضجيعينِ في قبرِ
ضجيعينِ في قبر عن الناسِ مُعزَلٍ... ونُقرَنُ يَومَ البعثِ والحشرِ

ولا أريد أن ينتهي كلامي معك، وألا يكون خطابي الأول هو الأخير ، فيا ليت شعري أعرف من أين لي بحروف تصف طيبة القلب وعذب الألفاظ وجمال الخلقة والخُلق .

سلامٌ على من لا يُمَلُّ كلامه...وإن عاشَرَتْهُ النَّفْسُ عَصراً إلى عصرِ

ملحوظة : تأخر حضورك ف سأتخيل :)

نفسي اتسدت

ماعرفش أقولك إيه ؟!!

بس أنا نفسي اتسدت

تخيلي لما يبقى أكتر واحد متفائل وبيدعو للتفائل

يبقى خلاص مش قادر

مش قادر أضحك ولا ألعب رياضة 

وماعنديش أي طاقة إني أكتب أو أقرأ 

أو حتى أفتح نقاش يزيد عن دقيقة مع أي حد

طبعا الظروف الإقتصادية للبلد 

والوضع المادي لي هو سبب رئيسي 

لكن السبب الأكبر هو أخلاق الناس 

اللي بيعرفك على أساس مصلحة 

واللى بيحترمك عشان تخلصله شغل 

واللي يبقى بينك وبينه كلام يروح ينقله

واللي يفتكرلك كلمة ماعلقش عليها زمان عشان يزلك بيها

واللي بيتفضل عليك علشان إنت اللى بتكلمه !!

الناس مابقتش مستحملة بعضها 

ومكشرين دايماً في وش بعض 

ده غير اللى دايماً مترقبين لأى مغفل 

يدور وشه بس الناحية التانية 

يخطف حاجته أو ينصب عليه 

تخيلي أنا أي حد ممكن ينصب عليا !!

لو انتى عاملة حسابك في واحد مصحصح كدة 

وبيتعلم من المطبات اللي بتعدي عليه 

يبقى أكيد مش أنا !!!

يمكن تشوفي إن الموضوع مش محتاج

وإني بأفور 

بس صدقيني 

أنا قربت أبعت جوابات للريس زي ما أحمد حلمي 

كان بيعمل في أسف على الأزعاج

وأقوله 

" ليه يا ريس الناس بتعاملني وحش ؟!! "

بس لاقيت إن الكلام ده لو وصله 

ح يريحني قوي :)

وأنا والله ما فارق معايا

بس نفسي أقابلك قبل ما أموت 

سهلة الإرضاء

ماعرفش ليه بطلت أتكلم معك عنك 

بس يمكن لإني فاقد الأمل إني ألاقيكي قريب

أو لأني مش لاقي كلام أقوله وخايف أستنزف مشاعري 

وأنا نفسي أقولك كل حاجة في وشك كدة :)

بس حصلي شوية مواقف مؤخراً عاوز أكلمك بخصوصها 

وخلاني أفكر بخصوص بعض الصفات اللى في معظم الستات

أنا نفسي ماتكونيش قمّاصة :)

ولما تزعلي مني تيجي تقولي على اللى مزعلك وبعدين لو حابة تزعلي ازعلي

لأن العتاب يدل على إن الشخصين مهمين لدى بعض

وإنك تبقى باقية عليا 

وبعد العتاب زي ما قولتلك 

لو لسة عاوزة تبقى زعلانة أنا مش ح أمنعك :)

وأرجوكي بلاش لما أسألك مالك وأنا حاسس إن فيه حاجة مديقاكي 

ماتقوليش مفيش :)

وتاني حاجة 

قاعدة عامة 

أنا عمري ما حيكون قصدي إني أزعلك 

بس أنا عصبي وممكن أتخنق من موقف عادى جدا

فلو زعلتك بدون قصد 

كوني سهلة الإرضاء 

يعني لما أجي أصالحك مرة واتنين

اقبلي الصلح وعاتبيني 

لكن ماتلويش بوزك وترفضينى 

منتظرة مني أبذل مجهود أكبر 

وإنتى ح تعرفي أكيد إن نفسي قصير :)

لو عرفتى إني أكيد ح أحبك 

وميكونش قصدي زعلك 

وتراعي الكلام اللي فوق ده 

أكيد ح نرتاح كتير في حياتنا 

لا تخجل مني

لعله إذا جاء يوم وقرأتى تلك الخاطرة 

لعلك تهزأين بشأنها 

ولكنى لابد أن أقول

كان أحد زملائي مثلى لم يرزقه الله حظاً من الوسامة 

ولكنه على كل حال ارتبط بفتاة فى فترة الجامعة 

وكانت تلك الفتاة إذا أحب لقائها أو أحبت لقائه 

اختارت مكاناً بعيد عن الأعين 

ولم يفهم المسكين فى البداية 

لما تفعل ذلك ؟!!

ولكن شاء الله أن يعرف فى يوم من الأيام 

كانت تمشى فى الجامعة مع صحويبات لها 

فألقى عليها السلام 

فلم ترد !!!

وسمع صديقتها تسألها : هل تعرفيه ؟

فقالت : لا !!!

وعندما ذهب إلى البيت وجد منها رسالة 

أنه أحرجها أمام صديقاتها !!

وهنا قطع علاقته معها 

وما علاقة تلك القصة بي ؟!!

أن من تختار أن تقترن بي 

تحبنى كما أنا 

بهبلى وعبطى وشكلى العكر :) 

وأن تفتخر بذلك أمام الجميع 

وألا أكون مصدر إحراج وخجل لها 

أمام صديقاتها المتزوجات برجال أكثر وسامة !!

ثقتى أنا

ليس عيباً ولا محرماً أن أكون خائفاً 

ولكني دائماً ما أخشى إعلان ذلك 

فأعذو عدم رغبتى فى الإرتباط

بأني لا أريد الأن 

وما زلت صغيراً 

وأشياء من ذلك القبيل 

ولكني فى الحقيقة ترتعد فرائصي رعباً 

من الزواج وتحمل المسئولية 

وأخشى أن أكشف عن ذلك 

لأنه لدي الجميع من يخاف من المسئولية 

هو شخص لا يتحمل المسئولية !!

وهناك سبب أخر 

ليس سببه أني غير مؤمن بأن 

" عفوا تعفكم نسائكم "

ولا سببه أعمالي السيئة 

فبفضل الله وحده لم أخادن امرأة فى حياتى 

ولكن الأخلاق اندثرت 

ولا يرى إلا الظاهر القبيح 

وانحراف الفتيات أصبح لا حد له

وقد تظني للوهلة الأولى 

عدم ثقتى فى النساء 

ولكنك مخطئة 

فأنا سريع الثقة فى الجميع 

رغم إقتناعى بأنها تكتسب ولا تمنح 

ولكن ثقتى بنفسي هى المعضلة 

فدائماً أرى نفسى غير كفؤاً لأحد

وما الذي يميزنى عن باقى الرجال 

حتى تنقطع امرأة واحدة لي دون باقى الرجال 

ما الذي أمتلكه حتى تكتفى بي ؟!!

دون أن تخونني مع أحدهم ليعوض النقص والخلل الذي أحدثه فى حياتها 

والحقيقة أن ثقتى لا تعدم إلا من جانب النساء 

فهي مرتفعة وأحافظ علي الحد الفاصل بينها وبين الغرور 

ولكن عند النساء 

لا أجد من تلك الثقة ما يكفى ليجعلنى أقدم على خطوة الإرتباط 

على الأقل فى الوقت الحالي 

حكايات ( 13 )

أشتاق إليكي 

كل لحظة هي قمة منحني الشوق 

أنا الفيلسوف الذي ينصح الناس بأن يعيشوا كل لحظة كما أنه لا يوجد غدا

أنصحهم ألا يحزنوا وألا يؤجلوا الفرح 

ألا يعتمدوا علي أحدهم ليدخل فى نفوسهم السعادة

بل هي تنبع من الداخل 

ها أنا ذا 

مكتوف الأيدى معصوب الأعين 

أؤجل كل شئ في حياتي 

حتى ألقاك 

أعتمد عليك حتي أحب من كل خلايا جسدي 

كل فرحة لا أحسها الأن 

كل كلمة عشق 

كل ضحكة 

انفرد بها العشاق من دوني 

أنتظرك لألقاها

كل ألم 

كل وحدة 

كل دمعة 

أنتظرك لتمحيها 

ألقي عليك فوق طاقتك 

وأتوقع منك فوق ما تتحملين 

ولكن يا ليتك تعلمين 

كم سأحبك إن فعلتي ؟!!

وكم سأحبك إن لم تفعلي ؟!!!

يكفي أن تحملتي إبتلاء إقترانك بي !!!

عروسة

حدثني أحدهم عن إحدي البنات ووصفها لي بحكم أنها أخت زوجته

فقال أنها متدينة وجميلة منتقبة حافظة لكتاب الله وتدرس فى كلية شرعية فى جامعة الأزهر

والدها إمام مسجد غير منتم لجماعة ييسر علي خطّاب بناته

صفات كثيرة تمنيتها فيكي

فترددت أن أفاتح أبي في الأمر !!!

لا أدرى كيف يجرؤ الشباب على مفاتحة أبائهم فى أمر الزواج

ولكن بعد مشاورات مع صديق لي قررت أن أكلمه

تملكني الخجل وقلت في صوت متقطع فى الهاتف

- أبي ممكن أقولك علي حاجة

- قول يا بابا

- بس ده مجرد أخد رأي مش فرض

- ما تقول يا ابنى

- دلوقتى فيه واحد جايبلي عروسة صفتها كيت وكيت وحضرتك عارف ظروف عملي وظروفي المالية فأنت تري أنه ينفع ولا ماينفعش ؟

- ماينفعش

صدمني بكلمته رغم أني أهلته لقولها، كنت أنتظر أن يقولها بطريقة أخري !!!

وبعدها بيومين

- إنت زعلان ولا إيه يا محمد ؟

- أزعل ليه بس، مفيش حاجة محتاجة زعل

- يا ابنى هو صنف وخلص

- أه يا أبي صنف وخلص، وإنك تلاقي حاجة منه دلوقتى صعب، بس علي العموم مفيش حاجة محتاجة زعل، ووعد مني لحضرتك مكلمكش فى موضوع الزواج ده تاني

- يا ابني والله أكتر من الهم علي القلب

- خلاص يا أبي والله ما فيه حاجة

كما تعلمين أني لست متعجل علي الزواج أبداً ، ولكن سماع أن أحدهم بصفاتك، يثير في نفسي الجنون أنك ستضيعي مني !!!

لو كنتي أنتي المذكورة فلا شك أنك لن تتزوجي غيري، فأنتي رزقي وأنا رزقك

فقط انتظري وأعدي نفسك كما أعد نفسي لك

حكايات ( 11 )

أنا مش بخيل 

لكن برضه مش منجم 

ولا بأفهم التلميحات 

يعني لما تقوليلى 

" صاحبتى خرجت مع زوجها " 

عمرى ما حأفهم من كدة إنك عايزانى أخرجك

ولما تقولى 

" الفستان ده بقى ضيق عليا جدا "

عمرى ما حأفهم إنك عايزة واحد جديد 

وهكذا فى كل حاجة

لما تعوزى حاجة 

قوليها على طول ومباشرة 

وده مش حيقلل من قيمتك عندى 

أنا بأحترم الصراحة والوضوح

حكايات ( 10 )

على قد ما أنتى وحشانى

وأوقات كتير فاتت 

كنت بأتمنى تكونى جنبى

تساندينى وتشجعينى وتدعيلى

أنا دلوقتى بأحمد ربنا 

إنى لسة مشوفتكيش 

عشان مأحبش تشوفينى 

وأنا ضعيف وعاجز 

عارف إن رزقى لن يأخذه غيرى

وإنى لن أموت ما دام لى لقمة أو جرعة ماء 

بس إحساس صعب 

أول مرة أحسه 

إحساس .....بالعجز :(

حكايات ( 9 )

عايزة تعرفى أنا اخترت الأسماء دى ليه ؟!!

أنا عايز لإبنى إسم يحبه ويفتخر بيه

ولا يخجل أن يردده 

ولا يدعو علي لأنى لم أحسن تسميته

" عبد الله "

يذكره دائماً بوجوب العبودية لله

فيكون زاجراً له عن المعاصى معيناً على الطاعات

ونعلم الولد 

" أنا سميتك عبد الله تيمناً بعبد الله بن عمر وعبد الله بن عمرو لتكون مثلهما "

أما البنات فاخترت إسم حبيبة

لأنك لا تتخيلى مقدار الحب الذى سأحبه لإبنتى الأولى 

ربما يعادل حبى لكى !!!

كما أنه من شدة ولهى بكى ، أريدك أن تكونى 

" أم حبيبة " :)

حكايات ( 8 )

أنا عارف إنك نفسك تختارى أسماء أولادك بمزاجك

بس هو لا بمزاجى ولا مزاجك !!

ده النبى - صلى الله عليه وسلم - قال : " أحب الأسماء إلى الله عبد الله وعبد الرحمن "

وأنا عارف مقدار حبك لربنا ولرسوله

وإستحالة تقدمى ما تحبى على ما يحب !!

فالموضوع خلصان 

لو أولاد يبقى عبد الله وعبد الرحمن

ولو بنات 

أنا نفسى فى حبيبة وحفصة وحنين 

حأبقى آخد رأيك فى أسماء البنات :)

أينعم رأيك ملوش أى لازمة :)))

بس عشان أنا راجل أؤمن بالحرية وتعدد الأراء 

حأسمع رأيك

وبرضه حبيبة وحفصة وحنين :))

حكايات ( 7 )

مش فارقة معايا إسمك إيه ؟!!

يا رب يكون 

زليخة .... فتكات ..... نحمدو ..... أى حاجة !!!

بس طبعاً بأتمنى يكون إسم جميل 

حتى يكتمل إمتلاك حبك لجنبات قلبى 

يا ريت يكون إسم رقيق زى

ياسمين ...... هند ...... منة ......بسمة

أو إسم فخم يليق بك زى 

زينب ..... عائشة ...... فاطمة ..... ريحانة 

وأتمنى ميكنش إسم مايع زى

نانسى ..... هيفاء

أو إسم ملوش معنى ولا طعم زى 

أسيل ..... ريتال ..... ريتاج

ويا ريت بقى ميكنش إسمك

مى ولا سمر ولا سلوى 

لأنى لا أطيق هذه الأسماء :) !!!

حكايات ( 6 )

عذراً إن تحدثت إلى غيرك خطئاً

أو نظرت لإخرى شذراً 

فأنا بشر

والبشر 

عادة ما يخطئون

لست مثلهم

ربما شهرتهم ألسنتهم وقوافيهم 

ولكن حبى لكى أكبر وأعظم

من حب عنترة لعبلة

وقيس لليلى 

وجميل لعزة 

وكثير لبثينة

لأنه حب شريف طاهر صافى

يتبع حب الله وطاعته ولا يسبقهما

ولا أبالغ عند قولى

مصطفى وكاندى ما هما إلا مراهقين بالنسبة لنا !!!

سامحينى

لست ملاكاً منزلاً

ولا نبياً مرسلاً

إنما إنسان ضعيف

بلغ العناء منه مبلغاً

ومهما كان العمل خالصاً

لوجه الله والأخرة

لابد من وجود هدف دنيوى

أعيش على أمل تحقيقه والوصول إليه

هدف كالبلسم يطيب الجروح

فلا يبقى منها أثر

ليحول كل ألم إلى أمل

لينبت فى الصخر الورود

فتصبح رائحة الرمال فلاً وعنبراً

وينقلب الغراب بلبلاً مغرداً

لتحلو الحياة ويلذ الشقاء

لتكونى لى أجمل الأهداف وأطيبها 

ولكنك لست هنا

ولا أعلم من تكونين ؟!!

ولا أين أرضك ؟!!

وكأن الجروح تأبى أن تندمل 

لتلاقى الرمال فتقيح وتدمل

لتكون طعاماً سائغاً للغربان 

سامحينى وأدعى لي الله أن يسامحنى   

يوم الزيارة

جاءت كل حبيبة إلى حبيبها

وكل مخطوبة إلى خطيبها

وكل زوجة إلى زوجها

كم كنت أتمنى أن أراك

وأعلم منك نفس الحنين إن لم يزد

ولكن الله لم يأذن بعد 

أخشى كما تخشين بنقابك

أن تتناقلك الأعين الجائعة

تلك الأعين التى لا تختلف كثيراً 

عن أنياب مصاصى الدماء

لا تترك فريستها حتى تنتهى منها

أحببت فقط أن أعلمك أنى إفتقدتك كثيراً فى هذا اليوم

وكل يوم