وأنا نايم فى الغيبوبة
من حادث مجلس شورى
مش عارف دى كهربا
ولا حتى دى أنبوبة
جانى مرسال وقالى
الحق حادثة فى الدويقة
قولتلو إيه اللى حصل تانى
أصل أنا زهقت وراسى وجعانى
قالى صخرة وقعت على الناس
قوم بقى ومتبقاش أنانى
ساعد إخوانك ويبقى نام تانى
قمت على السرير وقلت فى بالى
أنا عمرى م كنت أنانى
رحت الدويقة ..... وشفت الدويقة
ويا ريتنى ما شفت الدويقة
ناس ميتة وبيوت متهدمة واللى بيبكى
واللى بصرخ واللى بيقول حرام كدة
ويا ريتنى شفت مسئول
ولا حتى حد معقول
وقلت فى بالى حتى لو فيه مسئول
ح يعمل إيه من غير حلول
وعشان يجيب حلول
يشكل لجنة من علماء فحول
وعلى بال م تيجى الحلول
كان الدنيا عطول فى عطول
وم تحركش المسئول إلا بأمر الرئيس
بناءً على طلب الجمهور
قالو مات 49 ... لأ.... خمسين
قلت ولسة طول م إحنا نايمين
ح نلاقى كل يوم ميتين
مش كفاية العراق وفلسطين
وزاد عدد الميتين
أصبحوا 70 ..... لأ ....80
مش عارف أعد من كتر الميتين
قالوا ح ندى كل واحد شقة تعويض
قلت ببساطة كدة من غير تعقيد !!
واتمنيت ده يحصل ... ده شئ فريد
واللى حسبته لقيته من التعقيد والتقعيد
قليل خدوا الشقة
والباقى منتظرين مدة إيد
مش كفاية اللى حصل لهم
ولا ذنبهم إنهم مساكين
دلوقتى مستقبل أولادهم
مش أحسن من الطين
ومهما عدت ومهما قلت
محدش عارف إحنا بنكلم مين
وقال عاملين نفسهم فاهمين
فى احتياجات المساكين
وبكرة ننسى اللى حصل
ومنبقاش فاكرين
وننام ونصحى على كارثة تانية
وموت بنى آدمين
أنا خلاص زهقت من الكتابة
يا ريت حد يسمع ويساعد المحتاجين
كتبت عقب أحداث الدويقة وما أشبه اليوم بالبارحة
