نصائح وليد اللولبية للخطوبة المثالية

وليد شاب جدع من الشباب الريفي الجميل 

وابن بلد زينا كدة ويعرف الواجب

دخل الجيش بعدي بستة أشهر وطلع بعدى بسنة ونص

والست شهور اللى قضيتهم معاه 

كان مبلطج أعلى بلطجة :)

على الرغم إنه يعتبر عسكرى مستجد 

إلا إنه عرف يصرف نفسه 

ويزوغ من كل حاجة فيها شغل وتعب :)

خلصنا الجيش 

وقابلته 

وبيحكيلى على خطوبته وخطيبته 

بما إننا أكتر من إخوة 

وبيوزني كالعادة إنى أسرع وأخطب 

وأعيشلى يومين على حد تعبيره :)

- هو انت فاكر يا ليدا لو خطبت حأكون زيك 

لا يا كبير 

أنا إن شاء الله مفيش كلام بينى وبين خطيبتى إلا فى بيتهم

ولا حتى ح يبقى معي رقم تليفونها 

لأنى بأعتبر دى خلوة 

- يبقى قابلنى لو حد عبرك بالأسلوب ده :)

 يا ابنى أمال حتتعرف عليها إزاي ؟

- ما اتعرف عليها فى بيتهم قدام أبوها يا معلم 

- لأ ، فيه كلام لازم يبقى بينكم بس 

- ده بعد العقد إن شاء الله 

- بص يا برنس عشان تخطب بنت 

اليومين دول لازم تبقى فهلوي 

وتقولها اللى هي عايزاه عشان تعملك اللى انت عايزه 

وتبقى خاتم فى صباعك 

- إزاى يا فتك ؟!!

- يعنى انت عايز تخطب 

وماتكلمش خطيبتك فى التليفون 

والبنت تبص حواليها 

تلاقى اللى مخطوبة واللى بتحب 

وانت مطنشها 

لازم تظبتلها هرمونتها يا معلم :)))

- :)) 

إزاى برضه ؟!!

- يعنى أنا مثلاً 

بتبقى مسافرة رايحة الجامعة 

اكلمها وهى لسة طالعة 

واقولها طمنينى أول ما توصلي 

وبعد شوية 

ابقى متأكد إنها لسة ماوصلتش

اتصل 

قال يعنى القلق مقطع كبدي :))

وأنا ولا فى دماغى أصلاً 

ما هى مع صحباتها ، هي يعنى مسافرة قطر :)

- :)

بس أنا مليش فى الكلام ده

اللى حاسه بأقوله واللى مابحسوش مابقولوش !!

- حتتعلم 

اخطب بس وتعالى 

اديك كورس فى الحنية :))

- الله المستعان :))

النصراني فى المسجد

لما كنت لسة فى الجيش 

كانت الأوضاع فى الكتيبة صعبة جداً

بالليل خدمة 

وبالنهار شغل 

ومش شغل عادي 

ده كان فحت وردم وبناء وشيل بلدورات وصبة وما شاكله 

فكان أحياناً لما يوزعوا طابور القائد بتاع 9 صباحاً على الأشغال المختلفة 

ميبقاش فيه شغل فيوزعونا نضافة

وفى الغالب ساعة كدة 

والقائد يفتكر حاجة كان عايز يعملها 

فيجمعونا تانى ويوزعونا على الشغل !!!

وفي يوم أحد أصدقائي استأذن من الشغل عشان يصلي 

دخل المسجد 

لقى محب مخلص كامل :)

والشخص الأولعبان صعب 

وملهاش علاقة بالديانة 

عساكر الأمن تدّور فى كل حتة فى الكتيبة على محب 

عشان يطلع شغل 

فى العنابر والحمامات والخدمات 

محب فص ملح وداب 

المكان الوحيد اللى عمر ما حد يفكّر إنه فيه 

راح محب واستخبى فى المسجد 

ولما يطلع يبقى يقولهم 

كنت فى الحمام أو العنبر أو أي حتة 

وماعرفتش إنكم عايزني :)

لو كان فيه كنيسة فى الكتيبة 

كنت فكرت أستخبى فيها :) 

عديل والكلاب

الإسلام هو دين الرحمة ، وما أرسل الله نبيه – صلى الله عليه وسلم – إلا رحمة للعالمين ، وما أنزل سبحانه الرسالة إلا رحمة للمؤمنين

قال تعالى : " يا أيها الناس قد جاءتكم موعظة من ربكم وشفاء لما فى الصدور وهدى ورحمة للمؤمنين " يونس 57

والله أقرب إلى عباده من وريد أحدهم وأرحم بهم من أمهاتهم اللائي ولدنهم ، فعن عمر بن الخطاب – رضى الله عنه – قال : قدم رسول الله بسبي ، فإذا امرأة من السبي تسعى قد تحلب ثديها ، إذا وجدت صبياً فى السبي أخذته فألصقته ببطنها فأرضعته ، فقال رسول الله : " أترون هذه المرأة طارحة ولدها فى النار ؟ " قلنا : لا والله وهي تقدر ألا تطرحه ، قال : " فالله تعالى أرحم بعباده من هذه بولدها " أخرجه البخاري

والرحمة التى يتراحم بها الناس فى الدنيا إنما هي من الله ، ففي الحديث الصحيح : " جعل الله الرحمة مائة جزء، أنزل فى الأرض جزءاً واحداً، فمن ذلك الجزء تتراحم الخلائق حتى ترفع الدابة حافرها عن ولدها خشية أن تصيبه "

وحض الإسلام على الرحمة وجعلها ثوابها بمثلها ، ففي الحديث الصحيح الذى رواه أبو داود والترمزي قال رسول الله : " الراحمون يرحمهم الرحمن، ارحموا من فى الأرض يرحمكم من فى السماء "

كما جعل جزاء الشديد القاسي متبلّد الحس بمثل صنيعه ، قال رسول الله – صلى الله عليه وسلم – " لا يحم الله من لا يرحم الناس " متفق عليه

وفى الحديث الأخر : " من لا يرحم لا يُرحم " ، قال ابن بطاّل - رحمه الله – : " فى هذا الحديث الحض على استعمال الرحمة للخلق ، فيدخل المؤمن والكافر، والبهائم المملوك فيها وغير المملوك، ويدخل فى الرحمة التعاهد بالإطعام والمساعدة فى الحمل وترك التعدى بالضر " .

ودلّ على ذلك حديث النبي – صلى الله عليه وسلم – فعن ابن مسعود عن النبى قال : " لن تؤمنوا حتى تراحموا " ، قالوا : يا رسول الله كلنا رحيم ، قال : " إنه ليس برحمة أحدكم صاحبه، ولكنها رحمة العامة " رواه الطبراني

ومن الناس من يتحجج بقساوة الناس وظلم الحكام ، فيتجرد من الرحمة ويخالف فطرته التى خلقه الله عليها ، ويعيشون فى الدنيا بمبدأ من لن أظلمه سيظلمني !! ، ومن سأحنو عليه سينقلب إحساني له نقمة عليّ !!

وهؤلاء ما قسوا إلا لنقص إيمان عندهم ، فالمؤمن القوي هو الرحيم على الضعفاء شديد على الظلمة ، فالرحمة ليست حناناً لا عقل له ، والقسوة لا ترتبط بتحقيق عدل أو إنصاف .

ومن رحمة الحيوان رحمة المرأة البغيّ بالكلب، ففى الصحيحين عن أبي هريرة ، قال رسول الله – صلى الله عليه وسلم - : " بينما كلب يطيف بركية كاد يقتله العطش إذ رأته بغي من بغايا بني إسرائيل فنزعت موقها فسقته فغُفر لها به "

ورأيت تلك الرحمة فى فترة استدعائي فى الجيش ، فقد قابلت ولد يزيد عن الثمانية عشر قليلاً يدعى عديل ، وقبل أن أصف فعله أعطيكم وصفاً بسيطاً ليتضح لكم المقال .

عديل متوسط الطول ، شمس الصعيد تركت أثرها على وجهه ولم يغير لهجته الصعيدية كما فعل غيره ، فهو ليس إذا من الشباب الذين تربوا تحت كنف " بابي ومامي " ، وصديق لكل الكتيبة ، فليس وحيداً يحتاج إلى صحبة !!

رأيته وقد صاحبه جروين صغيرين ، وذلك الأمر غريب فى الجيش لمن يعلم ، وقد أخذت الكلاب الصغيرة تتمسح فى قدميه جيئةً وذهاباً ، فلما سألت واستقصيت قالوا :

أنه وجدها وحيدة فى مكان ما فى الصحراء فجلبها إلى الكتيبة ، فأطعمها وأحسن إليها ، فراقبته فإذا به يفعل أكثر من ذلك ، فإنه يحممها ويطعمها من كانتين الكتيبة ما لذ وطاب من أرز بلبن وبيض وغيره ، مما جعله يفتح تقريشة خاصة بالكلاب .

ولمن لا يعلم فالتقريشة فى الجيش ، عندما تنتهى أموالك تشترى أشياء فإذا جاء راتبك للشهر القادم خصمت منه ما اشتريت ، حتى أن الكثير لا يجد له راتب فى أخر الشهر !! ، أى أن المرء فى الجيش فى أمس الحاجة لماله لأنه يمكن أن يمكث لا يعود لبيته شهوراً، فما الذى يدفع هذا الولد لفعل هذا غير شفقة ورحمة سكنت قلبه وملئت عليه جوانبه ؟!!

ارحموا أنفسكم من استرسالها فى الغيّ والمعاصى ، وارحموا رحمكم وصغاركم ونسائكم بالصلة والحب ، وارحموا الخدم بالترفق بهم ، وارحموا الحيوان والدواب بالإحسان إليها أو الكف عن أذاها ، ولا تقصر الرحمة على من تعرف فما كان الرفق فى شئ إلا زانه وما نُزع من شئ إلا شانه ، وإن الله يعطي على الرفق ما لا يعطي على العنف .

ورجعنا من الجيش

عندما هاتفني والدي مخبراً إيايّ

أن أحد الخفر جاءه بجواب استدعاء للجيش خاص بي

كان شعوري هو نفس الشعور عندما سمعت اسمي فى منطقة التجنيد

ساعة دخولي الجيش أول الأمر

فقط لم أفرح ولم أحزن

وقلت لعها خمسة عشر يوماً على سبيل النقاهة والإستجمام

ظاناً أن الاستدعاء سيكون كما كان الناس المستدعين إبان خدمتى

ولكن كل شئ قد تغير

أولاً لابد من الإلتزام بالزي العسكرى واستلام مخلة كاملة وحضور الطوابير

ثانياً النوم على الأرض ، افرش باطانية واتعامل

ثالثاًُ ممنوع التليفونات الحديثة ذات الكاميرات

والشئ المفرح الوحيد أن الكتيبة القحط التى لا نجد فيها ماءاً نشربه

صارت لا ينقطع عنها المياه إلا قليلاً !!!

وخيرونى بين الهنجر والخيام فاخترت الأول

مائة وستون شخصاً فى مكان واحد

من المستحيل أن تتوافق رغباتهم وطباعهم فى وقت واحد

وحظينا بالعديد من المحششاتية انتصفوا العنبر

يسهرون حتى الصباح يختبرون قوة صوت هواتهفهم فى أغانى شعبية بكلمات غير مفهومة

وناهيك عن من لديهم شخّارات بالكهرباء

طوال الليل يررد أحدهم خلف أخيه وكأنها مسابقة لأطول وأعلى شخرة :)

ولا ننسى هزيز ريح الصحراء ينفث فى جنبات الهنجر

فتشعر أن أحدهم يستخدم هليتى أو شنيور

كانت أيام طويلة كأنها أسابيع

قابلت فيها أصدقاء كثر أبى القدر أن يجمعنا رغماً عنّا

ما دامت مشاغل الحياة قد شغلت أحدنا عن الأخر !!

وقابلت شخصيات تمنينا ألا نراها بعد جيشنا أبدا

وها نحن نقابلهم أيضاً رغماً عنّا

وتبين لي أن كثير من الشباب الذين من المفترض أن نعوّل عليهم لبناء مستقبل

لا يفكرون إلا فى الجنس 

ولا يسألون إلا عن جماع المرأة واستمتاعه بها !!!

وتذكرنا القائد السابق

وقارناه بالقائد الحالى الذى عاصرناه كرئيس عمليات

لكل منهم حسناته وسيائته

أعتقد أنه كان ضرورياً أن يحدث ذلك

لكى أستشعر عظم نعمة الحرية 

حرية النفس 

أن أفعل ما أريد وقتما أريد فى أى مكان أريد

ونعمة الطعام والشراب الحسن

ونعمة النوم فى مكانك الخاص على سرير ووسادة 

نعم لا نشعر بقيمتها إلا بفقدانها 

وفرصة للشعور بغير المستطيعين والمستضعفين 

فرّج الله عنهم ما هم فيه 

وجعل ما لاقيناه فى ميزان حسناتنا يوم نلقاه 

راجع الجيش

خير اللهم اجعله خير

جالى استدعاء فى الجيش 

حأروح 15 أو 21 يوم 

ماعرفش إيه المهمة المستعجلة اللى ماحدش عارف يعملها غيرى ؟ :)

بس على العموم 

نعتبرها نزهة وخلوة عن العالم بكل ملهياته 

وفرصة للعودة إلى سابق عهدنا من اللياقة 

ولو قرروا يودونا سينا 

- أصل الكتيبة اللى أنا فيها دايما بتطلع دوريات هناك - 

حتبقى فرصة أحقق حلمى :)

لا تنسونا من صالح دعائكم 

مذكرات دفعة ( 5 )

الناس فى الجيش أربع أنواع

ناس إرتاحت فى مركز التدريب وتشقى فى وحداتها

وناس شقيت فى مركز التدريب وترتاح فى وحداتها

وناس جيشها كله شقاء 

وأولاد محظوظة مقضينها فنيخة - أنتخة -

أنا كنت فى مركز تدريب المهندسين ببنى يوسف فى الجيزة

مياه 24 ساعة سخن وبارد

عيش سخن مخبوز طقة بطقة

طوابير بالنهار وطول الليل نايم 

وكنت مفكر نفسى تعبان !!!

لو كنت أعلم ما ينتظرنى 

لتمنيت أن أبقى هناك العام كاملاً !!

الصول خالد صديق

أو كما يحلو للبعض أن يسميه خالد عكاشة

تيمناً بالإعلامى الفذ توفيق عكاشة :))

علامة من علامات مركز تدريب المهندسين

يحب إلقاء المحاضرات فى كل طابور

ليتكلم فى مواضيع لا يوجد رابط واحد بينهم 

والسباب والحلف بالطلاق هما أسهل الأشياء عنده وبضاعته الرائجة

" إنت يلا يا باشمعفن يا باشمنتن على الطلاق ما تنفع جندى فى القوات المسلحة يلا "

" إنت قلبك مش نضيف يلا "

" أنا ممكن أحط صباعى فى عينك إشمعنا إنت حاطط صباعك فى ط ...... "

" إنت مهمل يا إبنى ، وصدقنى بيت المهمل بيخرب قبل بيت الظالم "

وعذره الأوحد عندى هو حب مصر الذى يجرى فى عروقه

الحب الذى يجعله ينظف الحمامات بيده ثم يشرب من خرطوم دورة المياه عادى جداً !!!!

" مصر دى هى أمك أو أختك وباقى الدول هم البلطجية اللى عايزين يخطفوها 

حتسيبهم ؟!! ........... تبقى خول يلا 

إنت تنزل تاخد محـ ..... فى بقك "

ليبقى الصول خالد علامة فى حياتى 

وشخصية لن أنساها :))

نص رغيف

حمدى : مفيش حاجة ناكلها يا ولاد بيقولوا الميس قافل

العبد الفقير : أيوة أنا رحت وتقريباً الولاد اللى عليهم الميس لسة مصحيوش أو مش راضيين يشتغلوا معرفش !!

مختار : بتهيألى فيه نص رغيف بايت من تلت أيام حاطه فى جيب الشنطة 

" إبتسامة خفيفة تعلو الوجوه وكأنه شئ عادى "

قام مختار وأتى به وقسمه فرفض فرج ودرهوس أن يأكلا

فرج : يا لهوى يا رجالة جه اليوم اللى نفك ريقنا على لقمة عيش بايتة !!

مختار : إنتوا حتنهبوا ، فين أيام الصحابة اللى كانوا بيقسموا البلحة

العبد الفقير : ده لو لقوها أساساً كانوا بيشدوا على بطنهم حجر من الجوع والنبى كان بيشد حجرين 

فرج : مفيش وجه للشبه والمقارنة هنا ، بتشبه الرجال بشوية خولات زينا 

" عم الضحك "

درهوس : هم كان كل همهم نصرة الإسلام وإحنا هنا بنحارب الإسلام 

" عاد الضحك ثانية "

العبد الفقير : كل واحد يتكلم عن نفسه ونيته لو سمحت :))

فأشار درهوس بإصبعه علينا : أنا راضى ذمتك ، ده منظر ناس حتحرر الأقصى ؟!!

كلنا بنفس واحد : لأ طبعاً :))

أيام صعبة

أيام صعبة يتسرب فيها كل شئ

حتى الأمل 

لم يبق منه إلا أسراب طائرات لا أدرى وجهتها

وأبراج المعادى

التى تحاول من بعيد أن تبدو شامخة 

ولكنها تفشل 

حين يسبقها المقطم من خلفها

ليظهر ضئالتها وقبحها 

إلى اللقاء أو الوداع :)

فى ظل هذه المرحلة العصيبة من تاريخ البلاد

أكد العقيد أحمد على المتحدث بإسم القوات المسلحة 

أن الفريق عبد الفتاح السيسى قد صرح 

" أنه لا خوف بعد اليوم وأن إنضمام مسلم مصرى إلى الجيش قد عزز من قوة الجيش العسكرية حتى أصبح القوة الأولى فى العالم "

طبعا ده كله كذب ومكع - مرادف الفشر - :)) 

اللى حقيقى فعلاً إنى 

بإذن الله تعالى سيتم ترحيلى إلى معسكر التدريب غداً أو بعد غد

وبالطبع سأتوقف عن التدوين 

وسأكتب لكم فى أول إجازة لى إن شاء الله 

ده إن ممتش فى القطر وأنا رايح

ولا انتحرت فى التدريب من سوء المعاملة

ولا طلعونى اتقتل على الحدود

ولا نزلونى الشارع أموت بملوتوف أو خرطوش

أنا غريب صحيح !!

يعنى ما ممكن أموت عادى دلوقتى وأنا بأكتب :)

أسألكم الدعاء

وإن لم يكتب لنا اللقاء ثانية 

إدعو لى بالرحمة والمغفرة وتذكرونى ولو بخير قليل

وجزاكم الله خيرا