الحب زى مسابقة
عاملاها شركة حاجة ساقعة أو مسحوق غسيل
فيه ناس تقعد تشترى كراتين وصناديق
ومتكسبش أى حاجة
وناس تانية تشترى قزازة
لمجرد إنه معه جنيه فكة خايف يقع منه
فصرفه إستخصار .......... وكسب !!!
.........................................................
الحب زى التدخين
لو مبدخنش مبطقش ريحة السجاير ولا اللى بيدخن
وتبص على المدخنين على إنهم فئة مش تمام
ويشاء ربنا إنك تدخن
وتصبح ريحة السجاير أفضل برفان تشمه
وتبص على غير المدخنين
وتقول هم إزاى عايشين من غيرها ؟!
حتى لو نويت تبطل
بتحاول تنسى وتبعد عن كل شئ له علاقة بالتدخين
وبتملى جيوبك لب وسودانى وبنبونى عشان يلهيك
بس بتيجى عليك أوقات نفسك مش فى نفس
لأ ، فى ريحة الدخان !!
عشان كدة كتير قوى بيرجعوا مرة واتنين وعشرة
وناس كتير بيفتكروا ده بسبب دماغه !!
لأ ، ده لأن قلبه اتعلق بيها
وصوابعه وشفايفه معدش ينفع يقفلوا إلا عليها
واللى بيثبت بجد
مش شطارة منه
ده عشان ربنا ثبنه
فيا رب ثبتنا ولا ترزقنا إلا الحلال
وإن طال بنا الحال فلا شئ عندك محال :)
السلام عليكم...
ردحذفجميلة كلماتك، مع اعتراضي على تشبيهك الحب بالسجائر، لسبب واحد فقط أنني من أنصار الحب ومن أعداء السجائر!!!
ع العموم سعيد بعودتك.
خارج الإطار/ إنت وقعت ولا إيه؟!؟!؟
ههههه
تقبل تحياتي...
وعليكم السلام ورحمة الله
حذفهى الفكرة فى وجه الشبه مش أكتر
خارج الإطار / هو حد لسه له نفس يقع :))
ربنا بس يعدى الفترة دى على خير وبعدين يبقى نقع براحتنا :)
نورتنى
حلو التشبيهين دول :)
ردحذفمتشكر جدا
حذفنورتى