تجربتى مع مواقع التواصل الإجتماعى ( الفيس بوك وتويتر ) ليست بالقصيرة
ولكنى احتجت بعض الوقت لأدرك ماهيتها
وأن اهتمامات الناس وإعجاباتهم وتعليقاتهم أخذت الترتيب التالى
1- صفحات المشاهير : لو كتب أى مشهور أى كلام ، فستنهال عليه التعليقات لتصف بلاغته وفقهه وحنكته !!!
2- الفكر والإنتماء لجماعة أو حزب : ستجد أن جميع أعضاء الحزب يوافقون ويباركون ويكبرون !!!
3- العلاقات الشخصية : الأقارب والأصدقاء لا يعرفون بعضهم إلا على البوست الواحد !!! ، وطبعاً الحبيبة :)
4- صفحات النكت والكوميكس والهلس المعتبر
5- الإعتبارات الجنسية : راجل عنده ألف صديق يكتب معلومة مفيدة ، واحد يعمله لايك !!! ، بنت عندها مائة صديق تكتب تصبحوا على خير ، خمسمائة لايك وألف وإنتى من أهله :))
6- التأثيرات البصرية : لو أن منشور أعجب به مجموعة كبيرة من الناس ، يعجب ويعلق عليه المزيد دون تفكير !!!
7- أهمية الموضوع وفائدته
وإحنا مالنا يا عم ، خلينا هنا بتجيب فى سيرة الناس ليه ؟!!!
ثم إن مش كل الناس كدة
معاك جداً إن مش الكل بس نسبة كام بالله عليك ؟
خلينا واقعيين
برضه مش فاهم عايز توصلى إيه ؟!!
عايز أقولك إن أهمية ما تكتب هى أخر حاجة حيفكروا فيها !!!
يعنى عايزنى أهلس عشان أعجبهم ؟!!!
لاااااااااااا طبعاً
إنت تكتب اللى مقتنع بيه وتعتقده وملكش دعوة بحد
طب فين بقى المشكلة ؟
المشكلة إن الكلام ده بدأ يمتد إلى هنا
ف تلاقى المدونات النسائية لها عدد كبير من المتابعين ، وتيجى تشوف اللى مكتوب ما هو إلا ( هلط نسوان ) !!!
وناس تانية أكاد أجزم أنها لا تقرأ شئ ، فقط تقول
رائعة
جميلة جدا
تحياتى
وناس بتعلق عشان يترد لهم التعليق
وناس عشان نشرت كتاب ف مينفعش يرد بعد كدة على تعليقات
وميعرفش إن هناك من أفضل منه لكن لم تأتيه الفرصة
وميعرفش إن غيره نشر عشرات الكتب واتنسوا ولا حد حيفتكرهم
وحاجات تانية كتير
فى حين إن فيه شباب وبنات زي الفل - ووالله أنا مش منهم عشان محدش بس يلعب الشيطان فى دماغه - لا يجدوا حتى من يشجعهم على الإستمرار !!!
نحن بين أمرين
أن نعترف ونبحث عن حلول
أو ندفن رؤسنا ونقول
لا إنت مكبر الموضوع
ردحذفبجد موضوع رائع
أولا صح جداا اللى بتقوله
بيحصل كده كتير بس تقريبا احنا لأننا مدمنين قراءة زى ما بقول دايما .. مش بناخد بالنا أو مش بنهتم كتير باللى بيحصل على الفيس .. يعنى المهم احنا ما نتأثرشى بسلبياته ونحاول نستفيد من ايجابياته
بالنسبة للمدونات
مش عارفه بس أنا الصراحة بلاقى فيها كتاب مميزين جداااا وأحسن من أى حد نشر كتاب
والمشكلة اللى بتواجهنى دايما انى انا فاشلة فى التعبير عن روعة كتاباتهم .. ومش بحب أكرر رائع أو جميل .. وده اللى بيخلينى أكتر الوقت أقرأ تدوينات كتير من غير ما أعلق
بس كلكم ما شاء الله زى ما قلت
شباب وبنات زى الفل
ربنا يوفقكم يااارب
وشكرا جدااا
جزاكم الله خيرا على رأيك
حذفأسعدنى مرورك
السلام عليكم...
ردحذفالمعاني الجيدة والكتابات الأصيلة ليست بحاجة لتصفيق المصفقين، ولإن كان التعليق هو ما سيدفعنا للكتابة، فلنتوقف عن الكتابة فورا!
ما أجمل أن يكون عملك لله خالصا!
أما عن الفيس.. فحدث ولا حرج!
وعليكم السلام ورحمة الله وبركاته
حذفاسمح لى أن أختلف معك كليا
ف مهما بلغ المرء ومهما كتب فإنه يود يوما ما أن يطلع عليه الناس ليستفيدوا منه أو ليدفع إلى الإستمرار وهذا لا يتعارض أبدا مع الإخلاص وإلا فما الذى يدفع العلماء إلى نشر الكتب !!
اخى الكريم ردا على مشاركتك ساقول لك تجربتى فى عالم العنكبوتية اولا علاقتى بالفيس تقرب من العامين والنصف وبعد الثورة قررت ان اقطع علاقتى به لاننى وجدته هو مصدر الفتن واشعال نيران الحقد والكره بين الجميع بسبب وبدون سبب ولا ادخله الا لاطمئن على متابعة بنتى لان لها صفحة وحينما امربلحظات ملل العب قليلابالنسبة للمدونات انا اكتب لاننى احب التدوين ولا انتظر ردافهناك الكثير من المشاركات لا تجد بها تعليق وهذا لم يوقفنى عن الكتابة ولكن لدى تجربة بصراحة ضايقتنى كثيرا لمجرد التفكير دخل شخص لا اعرفه وعلق وقال اختى وجدت مدونتك محترمة جدا وبها اشياء هادفة ووجدت متزوجة قلماذا تقحمى نفسك فى مثل هذا العالم بجد سؤال مستفز اذاكان هناك اناس سيئيين فليس الجميع من حقى كامراة ان تكون حرية فى الكتابة ولا ينقص هذا منى لاننى اراعى ربى قبل ان اراعى ضميرى اما بالنسبة لترتيبك فى الاهمية فانا اعتقد انها ترجع الى طبيعة الشخصية وغرضها من دخول عالم النت فبفضل الله انا من الناس التى تعتبر هذه التكنولوجيا فوائدها اكثر بكثير من مساوئها لاننى ابحث عن المفيد واكيد هناك اناس كثيرة على هذه الشاكلةوآسفة على الاطالة شكرا لك
ردحذفوالله أسعدنى ردك كثيرا ، وأريحيتك فيه
حذفوالله وأنا مثلك هناك الكثير ليس له تعليق ولكنى لا اتكلم عن نفسى فقد كتبت قبل ذلك أنى أكتب لنفسى
ولكن يصعب علي أن أجد المواهب مهملة
أما بالنسبة للشخص ذلك فهو جاهل لا محالة فلا تلقى إليه بالاً
وبالطبع فى كل مكان الجيد والسيئ
أسعدنى مرورك
شوف ياريس :)
ردحذفكل كلمه كتبتها انت هنا انا موافقه عليها تماااااااماا
بس صدقني
اللي جاي هنا ومستمر هو اللي بيدور علي الكلمه الصح
لكن اللي مشي وماعمرش
يااما من النوعيه اللي ماجالوش طهقان يتناقش ويستني التعليقات فاراح للسهل
يااللي بلوجر مارضااااش طموحه
لكن الناس الصامده اللي ماسابتش مدونتها هي الناس اللي بتحب بلوجر
وده الفرق بين الاكله البيتي المسبكه (بلوجر)
والاكله التيكااااوي المطبوخه في الاوام اوام
:)
ناوي بقا تستمر معانا ولا هتهجر بلوجر وتاكل تويتر وفيس تيك اوي :))
بصى يا معلمة :)
حذفواضح قوى إنى بنتقد الفيس وتويتر
وواضح إنى من الناس اللى بتكتب حاجات مفيدة ومحدش بيعبرها ، ثم إنى فضلت سنة كاملة خافى بروفايلى على بلوجر لأنى متفرقش معى حكاية التعليقات
بس فيه ناس تستحق التشجيع والدفع للأمام لو كنتى قرأتى اللى كتبته كنتى فهمتى :))
تحياتى لكى
والله الفيس بوك زي مدينة الملاهي .. صدقت بارك الله فيك
ردحذففعلا والله
حذفوبارك فيكى أختى الكريمة
السلام عليكم
ردحذفالتعليق متأخر شوية معلش..
أتفق مع حضرتك جدًا فى كل كلمة وفيه كلام كتير منه كان نفسى أقوله بصراحة..
عن نفسى بحب جدًا أسمع ولو رأى واحد لأى تدوينة بكتبها لأنى بحب الكتابة وبعتبرها جزء كبير من شخصيتى.
أما عن الفيس محتاج نظرة تانية غير السائدة..لأنه ممكن يكون ساحة للحوار البناء وتبادل الآراء وتكوين فرق عمل ويأتى بثمار جيدة فى كل المجالات..لكن للأسف زى ما حضرتك قلت صفحات المشاهير وغيرها هى الغالبة.
جزاكم الله خيرًا على طرح الموضوع.
تحياتى.
وعليكم السلام ورحمة الله وبركاته
حذفالحمد لله إنى لاقيت حد فهم وجهة نظرى :)
شكرا لمرورك الكريم
والله معاك حق فى كل كلمة قلتها بس الا من رحم ربى
ردحذفيعنى ديما فى كل حاجة فى الحلو والوحش وصوابعك مش زى بعضها
بس اللى انتة كتبتة كوم وكلمة (هلط نسوان) دى كوم تانى انتة جبتها من انهى زمن دى :)
وفيها اية لما البنات يفضفضوا شوية عن نفسهم خلينا ياسيدى نهبل مش كفاية الحبسة اللى احنا فيها :)
وعارف ارخم حاجة فى الفيس اية ان مافيش dislike زى مافى
like مش عارفة لية
:))
حذفالصراحة ساعات كتير باعذركم والفضفضة أحسن من الاكتئاب على الاقل
نورتينى
اؤيدك في كل كلمة خاصة حكاية الفيس بوك والمشاهير دى حاليا كمان ظهر ناس ربنا يهديهم اصبحوا مش ورآهم حاجه غير الطعن والسب في أهل العلم والإنتقاص من قدرهم لمجرد إختلافهم فى الاراء وتراه في عمر إبنه ويتطاول عليه باهمز واللمز بجد شيئ يدعوا للإشمئزاز . اما المدونات فانا لا استطيع الحكم عليها لإن دى اول مدونه ادخلها فليست عندى خبرة . لعلك ترضي
ردحذف